ஜோகூர் பாரு, ஜூன்.15-
சிறுமி ஒருவரின் ஆபாசப் படங்களைப் பரப்பியதாகக் கூறப்படும் 'Grup Budak-Budak Sekolah Rendah' என்ற முகநூல் குழு மூடப்பட்டு விட்டதாகத் தகவல் தொடர்புத் துறைத் துணை அமைச்சர் தியோ நி சிங் தெரிவித்தார். மலேசிய தகவல் தொடர்பு - பல்லூடக ஆணையம் இந்த முகநூல் கணக்கை மூட மேத்தா நிறுவனத்துடன் தொடர்பு கொண்டதாக அவர் கூறினார்.
இந்த விவகாரம் குறித்து முழுமையான விசாரணை நடைபெற்று வருவதாகவும், தகவல் தொடர்பு - பல்லூடக ஆணையம், காவல்துறை ஆகியவற்றோடு பிற சம்பந்தப்பட்ட தரப்புகளுடன் தொடர்ந்து இணைந்து செயல்படும் என்றும் அவர் குறிப்பிட்டார். இதற்கிடையில், தொடக்க, இடைநிலைப் பள்ளிகளுடன் உயர்கல்வி நிலையங்களை இலக்காகக் கொண்ட இணையப் பாதுகாப்பு பிரச்சாரத்தையும் ஆணையம் செயல்படுத்தி வருகிறது.
