கிளந்தான், குவா மூசாங் - லோஜிங் சாலையின் 90-வது கிலோமீட்டரில், நேற்று காலை 7.30 மணியளவில் நிகழ்ந்த ஒரு விபத்தில், டிரெய்லர் லாரி ஒன்று கட்டுப்பாட்டை இழந்து அருகில் இருந்த பள்ளத்தாக்கில் தலைகீழாக கவிழ்ந்து விபத்துக்குள்ளானது.
கிள்ளான் துறைமுகத்தைச் சேர்ந்த 30 வயதுடைய லாரி ஓட்டுநர், வாகனத்தில் ஏற்பட்ட பிரேக் கோளாறைச் சரிசெய்வதற்காக லாரியை சாலையோரமாக நிறுத்திவிட்டுச் சோதித்துக் கொண்டிருந்தார். அப்போது, எதிர்பாராதவிதமாக அந்த லாரி திடீரென முன்னோக்கி நகர்ந்து, இடதுபுறம் இருந்த ஆழமான பள்ளத்தாக்கில் விழுந்தது.
இந்த அதிர்ச்சியூட்டும் சம்பவத்தின் போது லாரியில் யாரும் இல்லாததால், ஓட்டுநர் எவ்வித காயங்களுமின்றி அதிர்ஷ்டவசமாக உயிர் தப்பினார். இச்சம்பவம் குறித்து குவா மூசாங் மாவட்ட காவல்துறைத் தலைவர் சுப்ரிடெண்டண்ட் சிக் சூன் ஃபூ கூறுகையில், லோஜிங் போலீஸ் சாவடி மூலம் தங்களுக்கு காலை 10 மணிக்குத் தகவல் கிடைத்ததாகவும், 1959-ஆம் ஆண்டு சாலை போக்குவரத்து விதிகளின் கீழ் இந்த விபத்து குறித்து மேல் விசாரணை நடத்தப்பட்டு வருவதாகவும் தெரிவித்தார்.
