பொது சேவைத் துறை ஆரம்பத்தில் சமர்ப்பித்த ஊதிய உயர்வுப் பரிந்துரை போதுமானதாக இல்லை என்று கருதியதாலேயே, அதனை அதிகரிக்க அதிகாரிகளுக்கு உத்தரவிட்டதாகப் பிரதமர் டத்தோஸ்ரீ அன்வார் இப்ராஹிம் தெரிவித்தார்.
பட்ஜெட் பற்றாக்குறையைக் கருத்தில்கொண்டு பொது சேவைத் துறை வழங்கிய முன்மொழிவை தாம் ஏற்க மறுத்துவிட்டதாகவும், அரசு ஊழியர்களின் அர்ப்பணிப்புக்கு உரிய பலன் கிடைக்க வேண்டும் என்பதற்காக அந்த ஊதிய உயர்வை உயர்த்தச் சொன்னதாகவும் அவர் குறிப்பிட்டார்.
வழக்கமாக அரசாங்கங்கள் நிதி நெருக்கடி காரணமாக இது போன்ற ஊதிய உயர்வுத் தொகையைக் குறைப்பதே வழக்கம். ஆனால், இந்த முறை அதற்கு மாறாகத் தாமே முன்வந்து தொகையை அதிகரிக்கச் செய்தது ஒரு வழக்கத்திற்கு மாறான முடிவு என்று அவர் சுட்டிக்காட்டினார்.
மலேசியா பொருளாதாரத்தில் வளர்ச்சி அடையவும், கொள்கைகள் வெற்றிகரமாக நடைமுறைப்படுத்தப்படவும் அரசு ஊழியர்களின் உழைப்பே முக்கியக் காரணம். அவர்களின் நலனைப் புறக்கணித்துவிட்டு, அவர்களிடம் திறமையான சேவையைக் கோர முடியாது என்று பிரதமர் மேலும் தெரிவித்தார்.
