கோலாலம்பூர், ஜாலான் கூச்சிங்கில் ஆறு வாகனங்கள் மோதிய விபத்தில் ஐந்து வயது சிறுமி உயிரிழந்த சம்பவம் தொடர்பான விசாரணை அறிக்கை, அடுத்தகட்ட நடவடிக்கைக்காகத் துணை அரசு வழக்கறிஞரிடம் சமர்ப்பிக்கப்படவுள்ளது.
கடந்த சனிக்கிழமை, சிகாம்புட் நோக்கிச் செல்லும் சாலையில் போக்குவரத்து மெதுவாக நகர்ந்து கொண்டிருந்தபோது, சிறுமி தனது தந்தையுடன் பயணித்த காரின் பின்புறத்தில் மற்றொரு கார் மோதியது. பின்புற இருக்கையில் அமர்ந்திருந்த சிறுமிக்குத் தலையில் பலத்த காயம் ஏற்பட்டதைத் தொடர்ந்து, கோலாலம்பூர் மருத்துவமனையில் உயிரிழந்ததாக அறிவிக்கப்பட்டது.
விபத்தை ஏற்படுத்தியதாகக் கூறப்படும் 24 வயது ஆண் ஓட்டுநர், சம்பவ இடத்தை விட்டுச் சென்ற பின்னர் டாமன்சாராவில் உள்ள தனியார் மருத்துவமனையில் மூளையதிர்ச்சிக்காகச் சிகிச்சை பெற்று வருகிறார். விசாரணை முடிக்கப்பட்டு வருவதாகவும், ஓட்டுநரின் உடல்நிலை கண்காணிக்கப்படுவதாகவும் கோலாலம்பூர் போக்குவரத்து விசாரணை மற்றும் அமலாக்கத் துறைத் தலைவர் ஜம்சுரி முகமது ஈசா தெரிவித்துள்ளார்.
