மலேசிய ஊழல் தடுப்பு ஆணையமான எஸ்பிஆர்எம்மின் மூத்த அதிகாரி ஒருவர், 2017ஆம் ஆண்டு தனிநபர் ஒருவரிடமிருந்து 3 லட்சத்து 50 ஆயிரம் ரிங்கிட் பெற்றதாகச் சமூக ஊடகங்களில் பரவும் குற்றச்சாட்டுகள் குறித்து போலீஸ் இரண்டு தனித்தனி விசாரணைகளைத் தொடங்கியுள்ளது.
புக்கிட் அமான் குற்றப் புலனாய்வுத் துறை இயக்குநர் எம். குமார் இதனைத் தெரிவித்தார். அரசுப் பணியில் உள்ளவர் தனது அதிகாரப்பூர்வப் பணியுடன் தொடர்புடைய நபரிடமிருந்து ஆதாயம் பெற்றதாகக் கூறப்படும் குற்றச்சாட்டு தொடர்பாகவும், அவதூறு மற்றும் இணையத் தொடர்புச் சேவைகளைத் தவறாகப் பயன்படுத்தியதாகக் கூறப்படும் விவகாரம் தொடர்பாகவும் விசாரணை நடைபெறுகிறது.
இந்தக் குற்றச்சாட்டு ஏற்கெனவே 2018ஆம் ஆண்டு விசாரிக்கப்பட்டு, தவறு எதுவும் நிரூபிக்கப்படாததால் வழக்கு மூடப்பட்டதாக எஸ்பிஆர்எம் தெரிவித்துள்ளது. எனினும், குற்றச்சாட்டு மீண்டும் பரவியதைத் தொடர்ந்து, எஸ்பிஆர்எம் தலைமை ஆணையர் டத்தோ ஶ்ரீ அப்துல் ஹாலிம் அமான் சிறப்புக் குழுவை அமைத்து மேலதிக விசாரணைக்கு உத்தரவிட்டுள்ளார்.
