புத்ராஜெயா,ஜன.10
கடந்த மாதம் அறிவிக்கப்பட்ட அமைச்சரவை மாற்றத்தைத் தொடர்ந்து புதியதாக தோற்றுவிக்கப்பட்டுள்ள இலக்கவியல் அமைச்சின் கீழ் டிஜிட்டல் நேஷ்னல் பெர்ஹாட் மற்றும் CyberSecurity Malaysia செயல்படும் என்று அறிவிக்கப்பட்டுள்ளது.
ஒரே அமைச்சாக செயல்பட்டு வந்த தொடர்பு மற்றும் இலக்கவியல் அமைச்சு, அமைச்சரவை மாற்றத்தில் இரண்டு அமைச்சுகளாக பிரிக்கப்பட்டுள்ளன. அமைச்சர் ஃபஹ்மி ஃபட்சில் தலைமையின் கீழ் தொடர்புத்துறை அமைச்சும், அமைச்சர் Gobind Singh Deo- தலைமையில் இலக்கவியல் அமைச்சும் தனித்தனியாக செயல்படுகின்றன.
இதில் நிதி அமைச்சரின் கழகமயமாக்கப்பட்ட துணை நிறுவனமான Digital Nasional Berhad- டிற்கு 5G அலைவரிசையும், உள்கட்டமைப்பையும் மேம்படுத்துதற்கான அதிகாரம் வழங்கப்பட்டுள்ளது.
மலேசிய தொடர்பு மற்றும் பல்லூடக ஆணையத்தினால் தொடர்புத்துறையை வழிநடத்துவதற்கான உரிமம் Digital Nasional Berhad – டிற்கு வழங்கப்பட்டுள்ளதாக புத்ராஜெயாவில் இன்று நடைபெற்ற செய்தியாளர்கள் கூட்டத்தில் தொடர்புத்துறை அமைச்சர் ஃபஹ்மி ஃபட்சில் இதனை தெரிவித்தார்.
எனினும் மலேசிய தொடர்பு மற்றும் பல்லூடக ஆணையம், தொடர்ந்து தமது தொடர்புத்துறை அமைச்சின் கீழ் செயல்படும் என்று ஃபஹ்மி ஃபட்சில் குறிப்பிட்டார்.
