நாட்டில் புகைமூட்டம் காரணமாகக் காற்றின் தரம் மோசமடைந்து வருவதால், ஜோகூர், மலாக்கா, நெகிரி செம்பிலான் ஆகிய மூன்று மாநிலங்களிலும் நாளை அக்டோபர் 14 ஆம் தேதி புதன்கிழமை அனைத்துப் பள்ளிகளும் மூடப்படும் என கல்வி அமைச்சு அறிவித்துள்ளது.
மேலும், சிலாங்கூரில் உலு லங்காட், சிப்பாங், பகாங்கில் குவாந்தான், பெக்கான், ரொம்பின்; சபாவில் தாவாவ், சரவாக்கில் செரியான், ஸ்ரீ அமான், லுபோக் அந்து ஆகிய ஒன்பது மாவட்டங்களிலும் பள்ளிகள் மூடப்படும். பாதிக்கப்படாத மற்ற பகுதிகளில் பள்ளிகள் வழக்கம்போல் இயங்கும்.
பள்ளிகள் மூடப்படும் காலத்தில் மாணவர்களின் கல்வி பாதிக்கப்படாமல் இருக்க, வீட்டிலிருந்து கற்றல் கற்பித்தல் நடவடிக்கைகளை மேற்கொள்ள வேண்டும் என கல்வி அமைச்சு அறிவுறுத்தியுள்ளது.
காற்றுத் தரக் குறியீடு 180ஐத் தாண்டினாலோ அல்லது தொடர்ந்து மூன்று நாட்களுக்கு 150க்கு மேல் பதிவானாலோ பள்ளிகளை மூட வேண்டும் என்ற நடைமுறையின் அடிப்படையில் இந்த நடவடிக்கை எடுக்கப்பட்டுள்ளது.
