கோலாலம்பூர், பிப்.21-
இன்று உலகத் தாய்மொழி தினம். உலகத் தாய்மொழி நாள் ஆண்டுதோறும் பிப்ரவரி 21 ஆம் தேதி கொண்டாடப்படுகிறது.
இந்த நாள் மொழியியல், கலாச்சார பன்முகத்தன்மை ஆகியவற்றின் முக்கியத்துவத்தை எடுத்துக் காட்டுவதோடு, தாய்மொழிகளைப் பாதுகாப்பதன் அவசியத்தையும் வலியுறுத்துகிறது.
2025 ஆம் ஆண்டிற்கான உலகத் தாய்மொழி நாளின் கருப்பொருள் "சர்வதேச தாய்மொழி நாளின் வெள்ளி விழா கொண்டாட்டம்" என்பதாகும்.
இந்த ஆண்டு தாய்மொழியைப் பாதுகாப்பதில் கடந்த 25 ஆண்டுகளில் நாம் செய்த முன்னேற்றத்தை எடுத்துக் காட்டுகிறது. மேலும், உலகளவில் தாய்மொழிக் கல்வியை ஒருங்கிணைப்பதற்கான முயற்சிகளை ஊக்குவிக்கிறது. அழியும் நிலையில் உள்ள சிறுபான்மை, பழங்குடி மொழிகளைப் பாதுகாப்பதற்கான அவசியத்தையும் இந்த கருப்பொருள் உணர்த்துகிறது.
இந்த ஆண்டு கருப்பொருள் ஒரு முக்கியமான மைல் கல்லைக் குறிக்கிறது. கடந்த 25 ஆண்டுகளில் மொழியைப் பாதுகாப்பதில் நாம் எவ்வளவு தூரம் முன்னேறியுள்ளோம் என்பதைச் சிந்திக்க இது ஒரு வாய்ப்பை வழங்குகிறது. அதே நேரத்தில், தாய்மொழிக் கல்வியை மேம்படுத்துவதற்கும், மொழியியல் பன்முகத்தன்மையைப் பாதுகாப்பதற்கும் நாம் இன்னும் நிறைய முயற்சிகள் எடுக்க வேண்டும் என்பதையும் இஃது உணர்த்துகிறது.
உலகெங்கிலும் உள்ள மொழியியல் ஆர்வலர்கள், கல்வியாளர்கள், கொள்கை வகுப்பாளர்கள் ஒன்றிணைந்து தாய்மொழிகளின் முக்கியத்துவத்தை வலுப்படுத்துவதற்கும், அழியும் நிலையில் உள்ள மொழிகளைக் காப்பதற்கும் பாடுபட வேண்டும்.
தாய்மொழி என்பது ஒரு தனிநபரின் அடையாளத்தின் ஒரு முக்கிய அங்கமாகும். இது அவர்களின் கலாச்சாரத்தையும், பாரம்பரியத்தையும் எடுத்துக் காட்டுகிறது.
தாய்மொழியைப் பாதுகாப்பது என்பது நமது சமூகத்தின் பன்முகத்தன்மையைப் பாதுகாப்பதாகும். எனவே, உலகத் தாய்மொழி நாளில், அனைத்து தாய்மொழிகளையும் பாதுகாப்பதற்கும், அவற்றை மேம்படுத்துவதற்கும் நாம் உறுதிமொழி ஏற்போம்.
ஒவ்வொருவரும் தங்கள் தாய்மொழியில் கல்வி கற்கவும், தங்கள் கருத்துக்களைப் பரிமாறவும் வாய்ப்பு பெற வேண்டும். மலேசிய நாட்டைப் பொருத்தவரையில், தொடக்கப் பள்ளி முதல் குறைந்தது இடைநிலைப் பள்ளி வரையிலாவது தாய்மொழிக் கல்வியின் தொடர்ச்சியை உறுதி செய்ய வேண்டும். மொழியியல் பன்முகத்தன்மை நமது சமூகத்திற்கு வலிமை சேர்க்கிறது என்பதை நாம் அனைவரும் உணர வேண்டும்.
