கல்வியில் பின்தங்கிய தமிழ்ப்பள்ளி மாணவர்களின் எதிர்காலத்தை மேம்படுத்தவும், அவர்களுக்கு வேலை வாய்ப்புகளை உருவாக்கவும் தொழில்திறன் பயிற்சிகள் முக்கியம் என்று பேராக் மாநில ஆட்சிக்குழு உறுப்பினர் டத்தோ அ. சிவநேசன் தெரிவித்துள்ளார்.
தமிழ்ப்பள்ளியிலிருந்து இடைநிலைப் பள்ளிக்குச் செல்லும் மாணவர்கள், மலாய் மற்றும் ஆங்கில மொழிகளில் பாடங்களைக் கற்பது உள்ளிட்ட சவால்களை எதிர்கொள்வதால், சிலர் கல்வியில் மேலும் பின்தங்கும் நிலை ஏற்படலாம் என்று அவர் சுட்டிக் காட்டினார்.
எனவே, மாணவர்களின் தனித்திறமைகளைக் கண்டறிந்து, வழக்கமான கல்விப் பாதைக்கு அப்பாலும் தொழில்திறன் பயிற்சிகள் மூலம் முன்னேற வாய்ப்புகளை ஏற்படுத்த வேண்டும் என்றார்.
கிந்தா மாவட்டத் தமிழ்ப்பள்ளி தலைமையாசிரியர் மன்றம் ஏற்பாடு செய்துள்ள, ஆறாம் ஆண்டு மாணவர்கள் இடைநிலைப் பள்ளிக்குச் செல்வதற்கான தயார்நிலைப் பட்டறை, அக்டோபர் 24ஆம் தேதி நண்பகல் 12 மணிக்கு பேரா மாலிம் நாவார் தமிழ்ப்பள்ளியில் நடைபெறவுள்ளது.
இத்தகைய முயற்சிகளை மற்ற மாவட்டங்களுக்கும் விரிவுபடுத்த வேண்டும் என்றும், மாணவர்களின் முன்னேற்றத்துக்குப் பேராக் அரசு தொடர்ந்து ஆதரவளிக்கும் என்றும் டத்தோ சிவநேசன் தெரிவித்தார்.
