நாட்டில் மக்கள் வசிக்கும் பகுதிகளில் 4ஜி தொலைத்தொடர்பு சேவை கடந்த ஜூலை மாத நிலவரப்படி 99.75 விழுக்காட்டை எட்டியுள்ளதாக தொடர்புத் துறை அமைச்சர் டத்தோ ஸ்ரீ ஃபாஹ்மி ஃபாட்சீல் தெரிவித்துள்ளார்.
எனினும், கிராமப்புறங்கள் மற்றும் தொலைதூரப் பகுதிகளில் வசிப்பவர்கள் இலக்கவியல் வசதிகளில் இருந்து ஒதுக்கப்படாமல் இருப்பதை உறுதி செய்வதும் அவசியம் என்று அவர் கூறினார்.
இதற்காக தேசிய இலக்கவியல் வலைப்பின்னல் திட்டத்தின் இரண்டாம் கட்டத்தின் கீழ், போதிய இணைய வசதி இல்லாத நாடு முழுவதும் 2,700 இடங்களுக்கு இணையச் சேவை விரிவுபடுத்தப்பட்டு வருவதாக அவர் தெரிவித்தார்.
13ஆவது மலேசியத் திட்டம் அரசாங்கத்தின் கொள்கை மட்டுமல்ல என்றும், மக்களுக்கு பயனளிக்கும் வகையில் செயல்படுத்த அனைத்து தரப்பினரின் ஒத்துழைப்பும் அவசியம் என்றும் ஃபாஹ்மி கூறினார்.
பல்கலைக்கழகங்கள், தொழில்துறை, ஊடகங்கள் மற்றும் பொதுமக்கள் தங்கள் கருத்துகளையும் ஆக்கபூர்வமான விமர்சனங்களையும் முன்வைக்க வேண்டும் என்றும் அவர் கேட்டுக் கொண்டார்.
