வரும் 2030-ஆம் ஆண்டிற்க்குள் சரவாக் மாநிலமானது, மலேசியாவின் இரண்டாவது பெரிய ஏற்றுமதி மாநிலமாக உருவெடுக்கும் என அம்மாநில முதல்வர் அபாங் ஜொஹாரி துன் ஒபேங் தெரிவித்துள்ளார்.
கூச்சிங்கில் இன்று நடைபெற்ற பார்ட்டி பெசாகா பூமிபுத்ரா பெர்சாத்து கட்சி மாநாட்டில் உரையாற்றிய அவர், தற்போது பினாங்கு, சிலாங்கூர், ஜோகூர் ஆகிய மாநிலங்களுக்கு அடுத்தபடியாக நான்காவது இடத்தில் உள்ள சரவாக், ஏற்றுமதியில் ஜோகூர் மற்றும் சிலாங்கூர் மாநிலங்களுடனான இடைவெளியைக் குறைத்து வருவதாகத் தெரிவித்தார்.
மேலும், மாநிலத்தின் தொழில்துறை விரிவாக்கம் மற்றும் எரிசக்தி தொடர்பான திட்டங்களில் மேற்கொள்ளப்படும் முதலீடுகள், ஏற்றுமதித் திறனை மேலும் வலுப்படுத்தும் என்றும் அவர் நம்பிக்கை தெரிவித்தார்.
அதேவேளையில் தொழில்நுட்பத்தைப் பயன்படுத்தி சரவாக் மாநிலத்தை ஆசியா வட்டாரம் மற்றும் உலக நாடுகளுக்கான முக்கிய மையமாக உருவாக்கத் திட்டமிட்டுள்ளதாகவும் அபாங் ஜொஹாரி குறிப்பிட்டுள்ளார்.
