ஜப்பானின் ஒசாகா நகரிலுள்ள டென்னோஜி உயிரியல் பூங்காவில் வைக்கப்பட்டுள்ள மலேசிய யானைகள் தாரா, அமுய் மற்றும் கெலாட் ஆகியவற்றை பராமரிப்பதற்காக கோலா கன்டா தேசிய யானைகள் பாதுகாப்பு மையத்திலிருந்து மூன்று மாவோட்கள் நியமிக்கப்பட்டுள்ளனர்.
அவர்களில், ஓராங் அஸ்லி செ வோங் சமூகத்தைச் சேர்ந்த அலி கடோங், இந்த மூன்று யானைகளையும் முன்பே கையாண்ட அனுபவம் கொண்டவர் எனத் தெரிவிக்கப்பட்டுள்ளது.
அவருடன் சுஹைமி இப்ராஹிம் மற்றும் முகமது ஃபைசல் அஹ்மத் ஆகியோரும் ஜப்பானுக்கு அனுப்பப்பட்டுள்ளனர்.
அவர்கள் மூவரும் கடந்த ஏப்ரல் 15-ஆம் தேதி பணிகளைத் தொடங்கியதுடன், இரண்டு மாதங்கள் அங்கு தங்கவுள்ளனர்.
தேவைக்கேற்ப கால அவகாசம் நீட்டிக்கப்படலாம் என்றும் தெரிவிக்கப்பட்டுள்ளது.
தற்போது யானைகளை கையாளுதல், பழக்கப்படுத்துதல் மற்றும் அவற்றின் உடல்நலத்தை கண்காணித்தல் ஆகிய பணிகளில் அவர்கள் கவனம் செலுத்தி வருகின்றனர்.
