18 முதல் 29 வயதுக்குட்பட்ட இளம் மலேசியர்களில் நீரிழிவு அல்லது உயர் ரத்த அழுத்தம் உள்ளவர்களில் 80 விழுக்காட்டுக்கும் மேற்பட்டோர் தங்களுக்கு அந்த பாதிப்பு இருப்பதை அறியவில்லை என்று சுகாதார அமைச்சர் டத்தோ ஶ்ரீ டாக்டர் ஸுல்கிஃப்லி அஹ்மாட் தெரிவித்தார்.
2023ஆம் ஆண்டுக்கான தேசிய சுகாதாரம் மற்றும் நோயுற்ற நிலை ஆய்வின் தரவுகளின்படி, இந்த வயதுப் பிரிவில் 192,464 பேருக்கு நீரிழிவும், 339,853 பேருக்கு உயர் ரத்த அழுத்தமும் இருப்பதாக மதிப்பிடப்பட்டுள்ளது. அவர்களில் 80 விழுக்காட்டுக்கும் மேற்பட்டோர் கண்டறியப்படாத நிலையில் உள்ளனர்.
நாடாளுமன்றத்தில் இன்று கேள்வி நேரத்தின்போது பேசிய டாக்டர் ஸுல்கிஃப்லி, ஆரம்பக் கட்டத்தில் அறிகுறிகள் இல்லாததால் இந்த நோய்கள் இளைஞர்களிடம் கவனிக்கப்படாமல் போவதாகக் கூறினார்.
இதனை எதிர்கொள்ள தேசிய சுகாதாரப் பரிசோதனை முயற்சியின் மூலம் 40 வயதுக்குட்பட்ட 26 லட்சத்து 50 ஆயிரத்துக்கும் மேற்பட்டோர் பரிசோதிக்கப்பட்டுள்ளதாகவும், அவர்களில் சுமார் 3 லட்சத்து 40 ஆயிரம் பேருக்கு உயர் ரத்த அழுத்தமும், ஒரு லட்சத்து 76 ஆயிரம் பேருக்கு உயர் ரத்தச் சர்க்கரை அளவும் கண்டறியப்பட்டுள்ளதாகவும் அவர் தெரிவித்தார்.
