மலாக்கா, நவம்பர்.30-
நேற்று இரவு மலாக்கா, டுரியான் துங்கால் பகுதியில் உள்ள ஃபெடரல் ஹைய்வே நெடுஞ்சாலை FT033-இல் 10 மீட்டர் நீளமும் 5 மீட்டர் அகலமும் கொண்ட ஒரு பெரிய பள்ளம் திடீரென ஏற்பட்டதால் பரபரப்பு நிலவியது. இந்த விபத்துக்குக் காரணம், சாலையின் 10 முதல் 11 மீட்டர் ஆழத்தில் இருந்த 1.8 மீட்டர் பரப்பளவிலான நிலத்தடி வடிகால் கட்டமைப்பின் தோல்விதான் என்று ஆரம்பக் கட்ட விசாரணையில் தெரியவந்துள்ளதாக பொதுப்பணி அமைச்சர் டத்தோ ஶ்ரீ அலெக்ஸண்டர் நந்தா லிங்கி தெரிவித்தார்.
சாலைப் பயனாளர்களின் பாதுகாப்பிற்காக உடனடியாக எச்சரிக்கை பலகைகள் வைக்கப்பட்டு, ஒரு வழிப்பாதை மூடப்பட்டுள்ளது. அதிர்ஷ்டவசமாக, இந்தச் சம்பவத்தில் உயிர்ச்சேதம் ஏதும் ஏற்படவில்லை. இதே போன்ற விபத்துகள் மீண்டும் நிகழாமல் இருக்க, இந்தப் பாதையில் உள்ள அனைத்து வடிகால் கட்டமைப்புகளையும் முழுமையாக ஆய்வு செய்ய அலெக்ஸண்டர் நந்தா லிங்கி உத்தரவிட்டுள்ளார்.
