பாஸ் ஆன்மீகத் தலைவர் ஹாஷிம் ஜாசின் உடல்நிலையில் முன்னேற்றம்

கோலாலம்பூர், மார்ச்.02-

இதய அறுவை சிகிச்சைக்குப் பிறகு, தீவிர சிகிச்சையில் இருந்த பாஸ் ஆன்மீகத் தலைவர் ஹாஷிம் ஜாசின், தற்போது சீரான உடல்நிலையில் உள்ளதாகத் தகவல்கள் கூறுகின்றன.

தனது தந்தையின் உடல்நிலையில், குறிப்பாக அவரது இதயம் மற்றும் சிறுநீரகங்களில் நேர்மறையான முன்னேற்றங்கள் தென்படுவதாகவும், அவரது மருந்துகள் படிப்படியாகக் குறைக்கப்படும் என்றும் ஹாஷிம் ஜாசினின் மகள் ஹுஸ்னா ஹாஷிம் தெரிவித்துள்ளார்.

அவரது சிறுநீரகங்கள் மேலும் முன்னேற்றம் அடைந்தவுடன், அவருக்கு ஆஞ்சியோகிராம் சிகிச்சை செய்ய மருத்துவமனை திட்டமிட்டுள்ளதாகவும் அவர் குறிப்பிட்டுள்ளார்.

அதே வேளையில், அறுவை சிகிச்சைக்குப் பிறகு, தனது தந்தைக்கு நுரையீரல் பிரச்சினைகள் ஏற்பட்டதாகவும், ஆனால் அது அவ்வளவு கவலைக்குரியது அல்ல என்றும் ஹுஸ்னா ஹாஷிம் தெரிவித்துள்ளார்.