மச்சாங்கில் 10 வயது சிறுவனைத் துன்புறுத்தியதாகச் சந்தேகிக்கப்படும் அவனது உறவினர்கள் இருவரை போலீசார் கைது செய்துள்ளனர். காயங்களுடன் மருத்துவமனையில் அனுமதிக்கப்பட்ட சிறுவனைப் பார்த்த மருத்துவ அதிகாரி அளித்த புகாரால் இந்த விவகாரம் வெளிச்சத்திற்கு வந்தது.
சம்பந்தப்பட்ட தம்பதியினரை ஏப்ரல் 27-ஆம் தேதி வரை 7 நாட்கள் தடுப்புக் காவலில் வைத்து விசாரணை நடத்தி வருவதாக மாவட்ட போலீஸ் தலைவர் அசூஹார் முகமட் நோர் தெரிவித்துள்ளார். பாதிக்கப்பட்ட சிறுவன் தற்போது சமூக நலத்துறையின் பாதுகாப்பில் ஒப்படைக்கப்பட்டுள்ளான்.
உடல் ரீதியான காயங்கள் மட்டுமின்றி, மனதளவிலும் பாதிக்கப்பட்டுள்ள அச்சிறுவனுக்கு முறையான ஆலோசனைகள் வழங்கப்பட்டு வருகின்றன. குழந்தைகளுக்கெதிரான இத்தகைய வன்முறைகளைத் தடுக்கப் பொதுமக்கள் எப்போதும் விழிப்புடன் இருக்குமாறு அதிகாரிகள் கேட்டுக்கொண்டுள்ளனர்.
