பட்டர்வொர்த் , ஜூலை 15-
பத்து ஆண்டுகளுக்கு முன்பு, 96 ஆயிரத்து 780 வெள்ளி மதிப்புள்ள நிறுவன சொத்துக்களை தவறாக பயன்படுத்தியதாக நிறுவனத்தின் முன்னாள் இயக்குநர் ஒருவர், பட்டர்வொர்த் செஷன்ஸ் நீதிமன்றத்தில் இன்று குற்றஞ்சாட்டப்பட்டார்.
நீதிபதி சுல்ஹஸ்மி அப்துல்லா முன்னிலையில் நிறுத்தப்பட்ட கமாருஸ்ஸமான் கமாலுதீன் என்ற 51 வயதுடைய அந்த முன்னாள் இயக்குநருக்கு எதிராக மொத்தம் நான்கு மோசடி குற்றச்சாட்டுகள் கொண்டு வரப்பட்டுள்ளன.
Syarikat Northern Petrochem Sdn. Bhd. நிறுவனத்தின் இயக்குநராக கமாருஸ்ஸமான் கமாலுதீன் பொறுப்பில் இருந்த போது, Syarikat Natureceuticals Sdn. Bhd. என்ற நிறுவனத்திற்கு சொந்தமான சொத்துக்களை தவறாக பயன்படுத்தியதாக அவர் மீது குற்றம் சுமத்தப்பட்டது.
கடந்த 2014 ஆம் ஆண்டுக்கும் 2015 ஆம் ஆண்டுக்கும் இடைப்பட்ட காலத்தில் பினாங்கு, Taman இந்தரவாசி, பேரை, Am Bank உட்பட நான்கு வெவ்வேறு பகுதிகளில் கமாருஸ்ஸமான் கமாலுதீன் இக்குற்றங்களை புரிந்ததாக நீதிமன்றத்தில் தெரிவிக்கப்பட்டது.
குற்றவாளி என்று நிரூபிக்கப்பட்டால் 6 ஆண்டு சிறை மற்றும் பிரம்படித் தண்டனை விதிக்க வகை செய்யும் குற்றவியல் சட்டத்தின் கீழ் கமாருஸ்ஸமான் கமாலுதீன் குற்றச்சாட்டை எதிர்நோக்கியுள்ளார்.
