கடந்த ஆண்டு அக்டோபர் 14ஆம் தேதி கொல்லப்பட்ட பண்டார் உத்தாமா பள்ளி மாணவி யாப் ஷிங் ஸுயேனின் தாயாரும் சகோதரியும், அவரது மரணம் தொடர்பாக பல தரப்பினருக்கு எதிராக கோலாலம்பூர் உயர் நீதிமன்றத்தில் சிவில் வழக்கு தொடர்ந்துள்ளனர்.
அக்டோபர் 1ஆம் தேதி தாக்கல் செய்யப்பட்ட இந்த வழக்கில், அரசின் பல்வேறு ஏஜென்சிகள், மாணவியை கொலை செய்த சிறுவனின் பெற்றோர் மற்றும் அந்தச் சிறுவனும் பிரதிவாதிகளாக குறிப்பிடப்பட்டுள்ளனர்.
மாணவர்களின் மனநலப் பிரச்சினைகளைத் தீர்ப்பதற்கும், உரிய தடுப்பு நடவடிக்கைகளை மேற்கொள்வதற்கும் சம்பந்தப்பட்ட தரப்பினர் தவறியதால், இந்த மரணத்தைத் தடுத்திருக்க முடியும் என்று குடும்பத்தினர் நம்புவதாக தாயார் தெரிவித்தார்.
இது பழிவாங்குவதற்கான வழக்கு அல்ல என்றும், இது போன்ற சம்பவங்கள் வேறு எந்தக் குழந்தைக்கும் ஏற்படாமல் சம்பந்தப்பட்டவர்கள் பொறுப்பேற்க வேண்டும் என்பதே நோக்கம் என்றும் அவர் கூறினார்.
மேலும், பள்ளி மாணவர்களின் மனநலம் தொடர்பான கொள்கைகள் முறையாகச் செயல்படுத்தப்பட வேண்டியதன் அவசியத்தையும் இந்த வழக்கு வலியுறுத்துவதாக அவர் தெரிவித்தார்.
