சிறையில் தடுத்து வைக்கப்பட்டிருந்தபோது உயிரிழந்த மூன்று ஆண்களின் மரணங்கள் குறித்து உடனடியாக நீதித்துறை விசாரணை நடத்த வேண்டும் என்று அவர்களது குடும்பத்தினர் கோரிக்கை விடுத்துள்ளனர்.
காவலில் நிகழும் மரணங்கள் மற்றும் துன்புறுத்தல்களை ஒழிப்பதற்கான அமைப்பின் தலைவர் எம். விஸ்வநாதன், இன்று செய்தியாளர் சந்திப்பில் இந்தக் கோரிக்கையை முன்வைத்தார். ஆர். ரிச்சர்ட், ஜி. மூர்த்தி, எம்எம் முனியாண்டி ஆகியோரின் குடும்பங்களைப் பிரதிநிதித்த அவர், குற்றவியல் நடைமுறைச் சட்டத்தின் 339-ஆவது பிரிவின் கீழ் விசாரணைக்கு உத்தரவிடுமாறு சட்டத்துறைத் தலைவர் அலுவலகத்தைக் கேட்டுக்கொண்டார்.
34 வயதான ரிச்சர்ட், மனச்சிதைவு நோயால் பாதிக்கப்பட்டவர். கடந்த ஆண்டு சுங்கை பூலோ சிறையில் தடுத்து வைக்கப்பட்டிருந்தபோது உயிரிழந்தார். அவரது உடலில் உட்புறக் காயங்கள் இருந்ததாகத் தடயவியல் அறிக்கை குறிப்பிட்டதாக அவரது சகோதரி ஆர். ரெமேக்கா தெரிவித்தார்.
இதற்கிடையே, மூர்த்தி கடந்த ஆண்டு மார்ச் மாதம் அலோர் ஸ்டாரில் உயிரிழந்தார். காஜாங் சிறையில் தடுத்து வைக்கப்பட்டிருந்த முனியாண்டி, இவ்வாண்டு ஏப்ரல் 13-ஆம் தேதி உயிரிழந்தார். அவரது கழுத்தில் ஏற்பட்ட காயத்தால் சுவாசக் குழாயில் வீக்கம் ஏற்பட்டு, தீவிர சிகிச்சைக்குப் பின்னரும் அவர் உயிரிழந்ததாக விஸ்வநாதன் கூறினார்.
மூன்று மரணங்கள் தொடர்பான விசாரணை ஆவணங்களைப் பெற்று, உரிய நீதித்துறை விசாரணைகளை உடனடியாக நடத்த வேண்டும் என்றும் அவர் வலியுறுத்தினார்.
