கோலாலம்பூர், ஜனவரி.22-
கூட்டரசு பிரதேச தினம் மற்றும் தைப்பூசத் திருநாள் ஆகிய இரண்டு பொது விடுமுறை நாட்களும் ஒரே நாளில் அதாவது பிப்ரவரி 1 ஆம் தேதி ஞாயிற்றுக்கிழமை வருவதால் ஏற்பட்டுள்ள குழப்பங்களைத் தவிர்க்க, அரசு ஊழியர்கள் அதிகாரப்பூர்வ சுற்றறிக்கைகளைத் துல்லியமாகப் பின்பற்ற வேண்டும் என்று கியூபெக்ஸ் (Cuepacs) தலைவர் டத்தோ டாக்டர் அட்னான் மாட் வலியுறுத்தியுள்ளார்.
அரசு மற்றும் தனியார் துறைகளுக்கு இடையே ஈடுசெய்யும் விடுமுறை வழங்குவதில் நிலவும் வேறுபாடுகள் குறித்த கேள்விகளுக்குப் பதிலளிக்கும் வகையில் அவர் இன்று இந்த நினைவூட்டலை விடுத்தார்.
2026 பிப்ரவரி 1-ஆம் தேதி ஞாயிற்றுக்கிழமை இந்த இரண்டு விடுமுறை நாட்களும் வருவதால், கோலாலம்பூர், புத்ராஜெயா மற்றும் லபுவான் ஆகிய பகுதிகளில் உள்ள அரசு ஊழியர்களுக்கு பிப்ரவரி 2 திங்கட்கிழமை ஒரு நாள் மட்டுமே ஈடு செய்யும் விடுமுறை வழங்கப்படுகிறது.
இருப்பினும், தனியார் துறை ஊழியர்களுக்கு பிப்ரவரி 2 மற்றும் 3 அதாவது திங்கள் மற்றும் செவ்வாய் ஆகிய இரண்டு நாட்கள் ஈடுசெய்யும் விடுமுறை வழங்கப்பட வேண்டும் எனத் தொழிலாளர் துறை அறிவுறுத்தியுள்ளது. இந்தத் தெளிவான நடைமுறைகள் கடந்த 2025 டிசம்பர் மற்றும் 2026 ஜனவரி 8 ஆகிய தேதிகளில் வெளியிடப்பட்ட சுற்றறிக்கைகளில் ஏற்கனவே விளக்கப்பட்டுள்ளன.
எனவே, இது குறித்த வதந்திகளை நம்பாமல் அதிகாரப்பூர்வ வழிகாட்டுதல்களைப் பின்பற்றுமாறும், விடுமுறை மாற்றங்கள் எதுவாக இருந்தாலும் அரசு ஊழியர்கள் தங்களின் பணி ஒழுக்கம் மற்றும் சேவை மனப்பான்மையைத் தொடர்ந்து நிலைநாட்ட வேண்டும் என்றும் அட்னான் மாட் கேட்டுக் கொண்டார்.
