முன்னாள் போக்குவரத்து அமைச்சரும், மசீச. கட்சியின் முன்னாள் தலைவருமான துன் டாக்டர் லிங் லியோங் சிக்-கின் மறைவிற்கு, தற்போதைய தலைவர் டத்தோ ஸ்ரீ டாக்டர் வீ கா சியோங் தலைமையில் அக்கட்சியினர் திரண்டு அஞ்சலி செலுத்தினர்.
துன் லிங்கின் மறைவையொட்டி, ஏப்ரல் 8-ஆம் தேதி இறுதிச் சடங்கு நடைபெறும் வரை அனைத்து கட்சி கொடிகளும் அரைக்கம்பத்தில் பறக்கவிடப்படும். செவ்வாய்க்கிழமை அன்று அவரது சவப்பெட்டி கட்சியின் கொடியால் போர்த்தப்பட்டு உயரிய மரியாதை அளிக்கப்படும்.
17 ஆண்டுகள் எம்.சி.ஏ தலைவராக இருந்த அவர், நாட்டின் போக்குவரத்து துறையில் பெரும் புரட்சியை ஏற்படுத்தினார். போர்ட் கிள்ளான் துறைமுகத்தை உலகத் தரத்திற்கு உயர்த்தியது மற்றும் கே.எல்.ஐ.ஏ விமான நிலைய உருவாக்கத்தில் இவரது பங்கு அளப்பரியது.
தார் கல்லூரி மற்றும் உத்தார் பல்கலைக்கழகத்தின் வளர்ச்சிக்கு வித்திட்டவர் இவரே. "கல்வியே எதிர்காலம்" என நம்பிய அவர், சாதாரண மக்களுக்காக நிதி திரட்டி கல்வி நிலையங்களை உருவாக்கினார்.
"அமைதியான மற்றும் அறிவார்ந்த தலைவர்" என புகழாரம் சூட்டிய வீ கா சியோங், அரசியல்வாதிகள் உணர்ச்சிகளைக் கட்டுப்படுத்தி கண்ணியத்துடன் செயல்படுவதற்கு துன் லிங் ஒரு சிறந்த உதாரணம் என்று குறிப்பிட்டார்.
