சபா, சண்டக்கானில் உள்ள பசார் பண்டார் ராமாய்-ராமாய் சந்தையில், ஆயுதம் ஏந்திய இரு குழுக்களுக்கு இடையே ஏற்பட்ட மோதல் தொடர்பாக 11 பேர் கைது செய்யப்பட்டுள்ளனர்.
கைது செய்யப்பட்டவர்களில் ஐந்து பேர் மலேசியர்கள் என்றும், ஆறு பேர் பிலிப்பைன்ஸ் நாட்டவர்கள் என்றும் சண்டக்கான் மாவட்ட போலீஸ் தலைவர் ஏசிபி ஜார்ஜ் அப்துல் ரக்மான் தெரிவித்தார். கைது செய்யப்பட்டவர்கள் 15 முதல் 46 வயதுக்குட்பட்டவர்கள் ஆவர்.
நேற்று மாலை 7.36 மணியளவில் NG999 அவசர உதவி எண்ணுக்குக் கிடைத்த தகவலைத் தொடர்ந்து போலீசார் நடவடிக்கை மேற்கொண்டதாக அவர் கூறினார்.
ஆரம்பக்கட்ட விசாரணையில், நள்ளிரவு 12.30 மணியளவில் ஏற்பட்ட தவறான புரிதலே இந்த மோதலுக்குக் காரணமாக இருக்கலாம் எனத் தெரியவந்துள்ளது.
இந்தச் சம்பவம் தொடர்பான காணொளி சமூக ஊடகங்களில் பரவியுள்ள நிலையில், ஆயுதங்களைக் கண்டறிவதற்கான விசாரணையும் தொடர்ந்து நடைபெற்று வருகிறது.








