புத்ராஜெயா, நவம்பர்.30-
மேற்கு சுமத்ராவில் படுமோசமான நிலச்சரிவில் சிக்கி, 30 வயதுடைய மலேசியரான அஸ்ருல் நிஸாம் பின் அப்ரிட்சோன் மாயமானதாக மலேசிய வெளியுறவு அமைச்சு உறுதிப்படுத்தியுள்ளது. இந்தோனேசியாவின் பாடாங் பஞ்சாங்கில் காணாமல் போன அஸ்ருலைத் தேடும் பணியில், மேடானில் அமைந்திருக்கும் மலேசியத் துணைத் தூதரகம், இந்தோனேசியாவின் பேரிடர் மீட்புப் படைகளுடன் இணைந்து தீவிரமாகச் செயல்பட்டு வருகிறது.
நிலச்சரிவும் வெள்ள அபாயமும் உள்ள பகுதிகளில் உள்ள மலேசியர்கள் அனைவரும் உள்ளூர் அதிகாரிகளின் உத்தரவுகளுக்குக் கண்டிப்பாகக் கீழ்ப்படியுமாறு துணைத் தூதரகம் வலியுறுத்தியுள்ளது. பேரிடர் காரணமாக பாடாங் – புக்கிட் திங்கி இடையேயான முக்கியப் பாதை மூடப்பட்டுள்ள நிலையில், பாதிக்கப்பட்ட பகுதிகளில் வசிக்கும் மலேசியர்கள் உடனடியாகத் துணைத் தூதரகத்தில் தகவல் தெரிவிக்குமாறு கேட்டுக் கொள்ளப்பட்டுள்ளனர்.
