கோலாலம்பூரில் 79 வயது முன்னாள் சிலாங்கூர் ஹாக்கி வீராங்கனையை கால்வாயில் தள்ளியதாக, 15ஆவது பொதுத் தேர்தலில் சுயேச்சையாகப் போட்டியிட்ட 59 வயது பெண் கைது செய்யப்பட்டுள்ளார்.
தாமான் ஓயுஜியில் உள்ள கடையொன்றிலிருந்து அந்த மூத்த பெண் வெளியேறியபோது, சந்தேக நபர் அவரைப் பின்தொடர்ந்து சென்று திடீரென தள்ளியதாக போலீஸ் தெரிவித்தது. இதில் அந்தப் பெண்ணின் முதுகு, இடது கை மற்றும் தலையின் பின்பகுதியில் காயம் ஏற்பட்டது.
சம்பவம் அங்கிருந்த கண்காணிப்பு கேமராவில் பதிவாகியுள்ளது. சம்பவம் தொடர்பில் நண்பர் ஒருவர் போலீசில் புகார் செய்ததைத் தொடர்ந்து, அதே நாளில் சந்தேக நபர் கைது செய்யப்பட்டார். ஆனால், தாம் அந்தப் பெண்ணைத் தள்ளவில்லை என சந்தேக நபர் மறுத்துள்ளார்.
வழக்கை விசாரிக்கும் வகையில், சந்தேக நபருக்கு மனநல மதிப்பீடு மற்றும் சிகிச்சை மேற்கொள்ள உத்தரவிடப்பட்டுள்ளதாக பிரிக்ஃபில்ஸ் மாவட்ட போலீஸ் தலைவர் ஹூ சாங் ஹூக் தெரிவித்தார். காயம் ஏற்படுத்தியதாகக் கூறப்படும் குற்றம் தொடர்பில் போலீசார் விசாரணை நடத்தி வருகின்றனர்.
