பேரா சுங்கை சிப்புட், கம்போங் பாவோங் பகுதியில் ஓராங் அஸ்லி ஆடவர் ஒருவரைக் கொன்றதாக நம்பப்படும் புலி, வனவிலங்கு மற்றும் தேசியப் பூங்காக்கள் துறையினரால் சுட்டுக் கொல்லப்பட்டுள்ளது.
கடந்த புதன்கிழமை ஙா இதாம் என்ற ஓராங் அஸ்லி ஆடவர், கிராமத்திலிருந்து சுமார் ஒரு கிலோமீட்டர் தொலைவில் மூங்கில் சேகரித்துக் கொண்டிருந்தபோது புலியின் தாக்குதலுக்கு உள்ளாகி உயிரிழந்தார்.
இதனைத் தொடர்ந்து, காட்டுப் பகுதியில் கண்காணிப்புப் பணியில் ஈடுபட்டிருந்த வனவிலங்கு அதிகாரி ஒருவரையும் அந்தப் புலி தாக்கியுள்ளது.
தற்காப்புக்காக அதிகாரிகள் நடத்திய துப்பாக்கிச் சூட்டில் புலியின் வலது தோள்பட்டை மற்றும் கழுத்துப் பகுதியில் காயம் ஏற்பட்டது. பின்னர், தாக்குதல் நடைபெற்ற இடத்திலிருந்து சுமார் 20 மீட்டர் தொலைவில் அதன் உடல் கண்டெடுக்கப்பட்டது.
புலியின் உடலில் நடத்தப்பட்ட முதற்கட்டப் பரிசோதனையில், இடது கீழ்த்தாடைப் பகுதியில் உள்ள கோரைப்பல் ஒன்று காணாமல் போயிருந்ததுடன், மற்ற கோரைப்பற்களும் மழுங்கிய நிலையில் இருந்தது தெரியவந்துள்ளது.
தொடர்ந்து, உடற்கூறு பரிசோதனைக்காக அதன் உடல் சுங்கை தேசிய வனவிலங்கு மீட்பு மையத்திற்குக் கொண்டு செல்லப்பட்டுள்ளது.








