கிள்ளான், ஜாலான் காப்பாரில் உள்ள பட்ஜெட் தங்கும் விடுதியில் 39 வயது பெண்ணைப் பாலியல் வன்கொடுமை செய்து, அவரிடமும் அவரது சகோதரியிடமும் ஆயுத முனையில் கொள்ளையிட்ட 53 வயது ஆடவருக்கு கிள்ளான் செஷன்ஸ் நீதிமன்றம் இன்று 15 ஆண்டுகள் சிறைத் தண்டனை விதித்தது.
சந்தானம் தங்கமணி என்ற அந்த நபர், கடந்த நவம்பர் 14-ஆம் தேதி அதிகாலை 5.50 மணியளவில், ஹோட்டல் அறையில் தூங்கிக் கொண்டிருந்த 39 வயதுப் பெண்ணின் அறைக்குள் அத்துமீறி நுழைந்து, திருப்புளியைக் கொண்டு மிரட்டியதாக தெரிவிக்கப்பட்டது.
பின்னர் அந்தப் பெண்ணிடம் பாலியல் பலவந்தம் புரிந்ததுடன் அருகிலிருந்த அறைக்குச் சென்று அப்பெண்ணின் சகோதரியிடமும் அத்துமீற முயன்றுள்ளார். பின்னர் அவர்கள் இருவரிடமும் மொத்தம் 900 ரிங்கிட் ரொக்கப் பணத்தையும், ஒரு கைப்பேசியையும் அந்நபர் பறித்துக் கொண்டு தப்பியோடியுள்ளார்.
முன்னதாக, கொள்ளைச் சம்பவத்தின் போது, அந்த நபர், மேல்மாடியிலிருந்து கீழே குறித்ததால் அவருக்கு கால் முறிவு ஏற்பட்டுள்ள நிலையில் அவர் அங்கிருந்து தப்பியுள்ளார் என்று நீதிமன்றத்தில் தெரிவிக்கப்பட்டது.
பலத்த போலீஸ் பாதுகாப்புடன் சந்தானம், கிள்ளான் நீதிமன்றத்திற்கு கொண்டு வந்த போது, காலில் சிமெண்டு கட்டுடன், இரு ஊன்றுக் கோல்களின் உதவியுடன் கால் தாங்கி, தாங்கி, அவர் நீதிமன்ற வாசலை வந்தடைந்தார்.
பாலியல் வன்கொடுமை, பணம் பறித்தல் மற்றும் ஆயுதத்தை பயன்படுத்தியது ஆகிய மூன்று குற்றச்சாட்டுகளை சந்தானம் ஒப்புக் கொண்டதைத் தொடர்ந்து அவருக்கு 15 ஆண்டுகள் சிறைத்தண்டனை விதிக்கப்பட்டது.








