தாபுங் ஹாஜியின் முன்னாள் தலைமைச் செயல்முறை அதிகாரி 70 வயது ஜோஹான் அப்துல்லா, முன்னாள் தலைமை நிதி அதிகாரி 63 வயது ரோஸைடா ஓமார் ஆகிய இருவர் மீதும், 2017ஆம் நிதியாண்டுக்கான 330 கோடி ரிங்கிட் ஹிபா தொகை வழங்கப்பட்ட விவகாரத்தில், நிர்வாகக் குழுவை ஏமாற்றியதாக இன்று குற்றஞ்சாட்டப்பட்டது.
கோலாலம்பூர் செஷன்ஸ் நீதிமன்றத்தில் நீதிபதி நோர்மா இஸ்மாயில் முன்னிலையில் குற்றச்சாட்டு வாசிக்கப்பட்டபோது, இருவரும் குற்றத்தை மறுத்து விசாரணை கோரினர். தாபுங் ஹாஜியின் மூன்று கட்டடங்களின் சொத்து மதிப்பைச் சந்தை மதிப்பைவிட அதிகமாகக் காட்டி, நிர்வாகக் குழுவின் ஒப்புதலைப் பெற்றதாகக் குற்றப்பத்திரிகையில் தெரிவிக்கப்பட்டுள்ளது.
குற்றம் நிரூபிக்கப்பட்டால், அதிகபட்சம் ஐந்து ஆண்டுகள் சிறை, அபராதம் அல்லது இரண்டும் விதிக்கப்படலாம். இருவருக்கும் தலா 60 ஆயிரம் ரிங்கிட் பிணை வழங்கிய நீதிமன்றம், ஆவணங்கள் சமர்ப்பிக்கப்படுவதற்காக டிசம்பர் 8ஆம் தேதியை வழக்கு மறுஅழைப்பு நாளாக நிர்ணயித்தது.
