ஈப்போ, மே.05-
ஈப்போ, தாமான் டேசா அமான் பகுதியில் உள்ள வீடு ஒன்றில் 70 வயது மதிக்கத்தக்க மூதாட்டி ஒருவர் வெட்டிக் கொலை செய்யப்பட்ட நிலையில் பிணமாக மீட்கப்பட்டுள்ளார்.
ஈப்போ மாவட்ட போலீஸ் தலைவர் உதவி கமிஷனர் முஹமட் நஜீப் ஹம்ஸா கூறுகையில், இந்த கொலைச் சம்பவம் குறித்து நேற்று இரவு 10 மணியளவில் போலீசாருக்குத் தகவல் கிடைத்தது. உயிரிழந்த மூதாட்டியின் உடல், தலை மற்றும் கழுத்துப் பகுதியில் பலத்த வெட்டுக் காயங்கள் காணப்பட்டதாக அவர் குறிப்பிட்டார்.
சம்பவ இடத்திலிருந்து கொலைக்குப் பயன்படுத்தப்பட்டதாகக் கருதப்படும் ஓர் அரிவாள் மீட்கப்பட்டுள்ளது. இக்கொலை தொடர்பாக 52 வயதுடைய அண்டை வீட்டுக்காரர் ஒருவரைப் போலீசார் கைது செய்துள்ளனர்.
கைது செய்யப்பட்ட நபர் கடந்த பிப்ரவரி மாதம் உலு கிந்தா மனநல மருத்துவமனையில் சிகிச்சை பெற்றவர் என்பது முதற்கட்ட விசாரணையில் தெரிய வந்துள்ளது.
இந்தச் சம்பவம் குறித்து தகவல் தெரிந்த பொதுமக்கள், ஈப்போ மாவட்ட போலீஸ் தலைமையகத்தைத் தொடர்பு கொண்டு விசாரணைக்கு உதவுமாறு முஹமட் நஜீப் கேட்டுக் கொண்டுள்ளார்.
