சொத்து தகராறில் வளர்ப்பு தாயை காயப்படுத்திய ஆடவனை போலீஸ் கைது

67 வயதுடைய வளர்ப்பு தாயாரை காயப்படுத்தியதாக கூறப்படும் 25 வயது ஆடவரை போலீசார் கைது செய்துள்ளனர்.

அந்நபர் நேற்று வியாழக்கிழமை மதியம் 1 மணியளவில் கோம்பாக்கில் உள்ள குடியிருப்புப் பகுதியில் வளைத்துப் பிடிக்கப்பட்டதாக சிரம்பான் மாவட்ட போலீஸ் தலைவர் ஏசிபி அரிஃபாய் தராவி தெரிவித்தார்.

அந்த ​மூதாட்டியின் பெயரில் உள்ள சொத்துக்களை தம்முடைய பெயருக்கு மாற்றச் சொன்னதாகவும், அதனை அந்த வளர்ப்பு தாயார் மறுத்து விட்டதாகவும் , இதனால் கோபமடைந்த அந்த நபர், வீட்டில் இருந்தப் பொருட்களை அந்த மூதாட்டியின் ​மீது ​தூக்கி எறிந்ததில் அவர் காயம் அடைந்ததாக விசாரணையில் தெரியவந்துள்ளது என்று ஏசிபி அரிஃபாய் குறிப்பிட்டார்.

அந்த ​மூதாட்டியின் இடது கண்ணில் ஏற்பட்ட பலத்த காயத்தினால் அவர் மருத்துவமனையில் அனுமதிக்கப்பட்டு ​தீவிர சிகிச்சை பெற்று வருவதாக ஏசிபி அரிஃபாய் மேலும் கூறினார்.