சிலாங்கூர் சுல்தான் சுல்தான் ஷராஃபுடின் இட்ரிஸ் ஷாவும், தெங்கு பெர்மைசூரி நூராஷிகினும் தமது 25 ஆம் ஆண்டு அரியணை நிறைவு விழாவையொட்டி 149 ஆதரவற்ற சிறார்களுக்கு சிறப்பு விமானப் பயணத்தை வழங்கினர்.
29 ஆதரவற்றோர் இல்லங்களைச் சேர்ந்த சிறார்கள் இதில் பங்கேற்றனர். சிலாங்கூர் அரச குடும்பத்தின் வெள்ளி விழா கொண்டாட்டங்களின் ஒரு பகுதியாக இந்த ஒரு மணி நேர விமானப் பயணம் ஏற்பாடு செய்யப்பட்டது.
சுபாங் ஸ்கைபார்க்கில் இருந்து புறப்பட்ட விமானம், பினாங்கு வான்வெளி வழியாக லங்காவி நோக்கிச் சென்று மீண்டும் சுபாங் திரும்பியது.
மலேசிய சுற்றுலா வாரியம் ஏற்பாடு செய்த இந்த நிகழ்ச்சியில், ராஜா மூடா சிலாங்கூர் தெங்கு அமீர் ஷாவும் கலந்து கொண்டார். புதிய அனுபவங்களை வழங்குவதன் மூலம் சிறார்களின் தன்னம்பிக்கையை வளர்ப்பதுடன், ஆதரவற்ற குழந்தைகளின் நலன் குறித்த பொது விழிப்புணர்வை அதிகரிப்பதும் இதன் நோக்கமாகும்.
