சிலாங்கூர் ராஜா மூடாவின் உதவியாளர் எனப் போலியாக நடித்து, சொத்து விற்பனை தொடர்பான மோசடியில் ஈடுபட்ட 40 வயது ஆடவருக்கு ஓராண்டு சிறைத்தண்டனையும், இரண்டு பிரம்படிகளும் விதிக்கப்பட்டுள்ளன.
அல் ஸுல்ஃபாட்லி அலியாஸ் எனும் அந்த ஆடவர், மோசடி தொடர்பான இரண்டு குற்றச்சாட்டுகளையும் ஒப்புக் கொண்டதைத் தொடர்ந்து, கோலாலம்பூர் மாஜிஸ்திரேட் நீதிமன்ற நீதிபதி அமிருல் அஷ்ராஃப் அப்துல் ரசிட் இந்தத் தண்டனையை விதித்தார்.
கடந்த அக்டோபர் 27ஆம் தேதி கைது செய்யப்பட்ட நாளிலிருந்து தண்டனையை அனுபவிக்கவும் உத்தரவிடப்பட்டது.
இந்த மோசடி தொடர்பாக அவருடன் குற்றஞ்சாட்டப்பட்ட அவரது வருங்கால மனைவி நுருல் நூர் ஷாஹிரா கமாருடின், குற்றச்சாட்டை மறுத்து விசாரணை கோரியுள்ளார். அவருக்கு 3 ஆயிரம் ரிங்கிட் பிணை வழங்கப்பட்டுள்ளது.
இதற்கிடையே, எகோ அர்டென்ஸ் பகுதியில் சொத்து மற்றும் சொகுசு வாகனம் விற்பனை செய்வதாகக் கூறி மருத்துவர் ஒருவரிடம் 155 ஆயிரம் ரிங்கிட் மோசடி செய்ததாக இருவரும் மற்றொரு வழக்கிலும் குற்றஞ்சாட்டப்பட்டுள்ளனர்.








