சரவாக், கூச்சிங்கில் உள்ள தனியார் பள்ளியில் ஆசிரியரைச் சிறிய கோடரியால் தாக்கியதாக 16 வயது மாணவர் மீது இன்று மூன்று குற்றச்சாட்டுகள் பதிவு செய்யப்பட்டுள்ளன.
கூச்சிங் மாஜிஸ்திரேட் நீதிமன்றத்தில் முன்னிலைப்படுத்தப்பட்ட அந்த மாணவரிடம் குற்றத்தை ஒப்புக் கொள்கிறாரா என்பது பதிவு செய்யப்படவில்லை. அவரை மனநலப் பரிசோதனைக்காக செந்தோசா மருத்துவமனைக்கு அனுப்ப நீதிபதி லியோனா டோமினிக் மோஜிலியு உத்தரவிட்டதுடன், வழக்கை டிசம்பர் 17ஆம் தேதிக்கு ஒத்திவைத்தார்.
முறையான காரணமின்றி தடைசெய்யப்பட்ட ஆயுதமாக வகைப்படுத்தப்பட்ட சிறிய கோடரியை வைத்திருந்தது, 42 வயது பெண் ஆசிரியரைக் கோடரியால் காயப்படுத்தியது, வெடிபொருட்களை வைத்திருந்தது ஆகியவை அவர் மீதான மூன்று குற்றச்சாட்டுகளாகும்.
கடந்த அக்டோபர் 21ஆம் தேதி காலை 7.50 மணியளவில் பள்ளி வளாகத்தில் இச்சம்பவம் நிகழ்ந்ததாகக் குற்றப்பத்திரிகையில் தெரிவிக்கப்பட்டுள்ளது.
இந்தத் தாக்குதலில் ஆசிரியரின் இடது கையில் காயம் ஏற்பட்டது. அவர் மருத்துவமனையில் சிகிச்சை பெற்று பின்னர் வீடு திரும்பினார். பள்ளி வளாகத்திற்குள் ஆசிரியர் கோடரியால் தாக்கப்படும் காணொளி சமூக ஊடகங்களில் பரவியதைத் தொடர்ந்து இச்சம்பவம் பெரும் கவனத்தைப் பெற்றது.








