கோத்தா கினபாலு, பிப்ரவரி.13-
சபாவில் 44 வயது பெண் ஒருவர் கொலை செய்யப்பட்ட சம்பவத்திற்கு, பணம் மற்றும் பொறாமை ஆகியவை முக்கியக் காரணமாக இருக்கலாம் என போலீஸ் தரப்பில் தெரிவிக்கப்பட்டுள்ளது.
உயிரிழந்த பெண்ணும் சந்தேக நபரும் முன்பு நிச்சயதார்த்தம் செய்திருந்தனர். அந்த காலகட்டத்தில் அந்தப் பெண் சந்தேக நபரின் சுமார் 7,000 ரிங்கிட் பணத்தைப் பயன்படுத்தியதாகவும், ஆனால் இறுதியில் அவரைத் திருமணம் செய்யாமல் வேறு ஒருவரை மணந்ததாகவும் கூறப்படுகிறது. இதனால் ஏற்பட்ட ஆத்திரமும் பொறாமையுமே இந்தத் துயரமான கொலைக்கு வழிவகுத்துள்ளது.
சம்பவத்தன்று அந்தப் பெண் சந்தேக நபரின் வீட்டிற்குச் சென்ற போது அவர்களுக்குள் வாக்குவாதம் ஏற்பட்டுள்ளது. தற்போது சந்தேக நபரும் அவரது மகனும் போலீசாரால் கைது செய்யப்பட்டு விசாரணை வளையத்தில் உள்ளனர்.
சபா போலீஸ் கமிஷனர் Datuk Jauteh Dikun கூறுகையில், இந்தக் கொலையில் சந்தேக நபர் பயங்கரமான ஆயுதத்தைப் பயன்படுத்தியதை ஒப்புக் கொண்டுள்ளதாகவும், சடலத்தைச் சிதைத்ததில் அவருக்குத் தொடர்பு இருப்பதாகவும் தெரிவித்தார்.
இந்தச் சம்பவத்தின் போது சந்தேக நபரின் மகனும் அந்த இடத்தில் இருந்ததால், அவர் இரண்டாவது சந்தேக நபராகக் கருதப்பட்டு விசாரிக்கப்பட்டு வருகிறார். தற்போது இந்த வழக்கு தீவிரமாக விசாரணை செய்யப்பட்டு வருகிறது.
