ஜோகூர் பாரு, ஜூலை.12-
16-வது ஜோகூர் மாநிலத் தேர்தலில் வாக்களித்து, தங்களது ஜனநாயகக் கடமையை நிறைவேற்றிய வாக்காளர்களுக்கு, நன்றி தெரிவிக்கும் வகையில், நாளை ஜூலை 13 -ஆம் தேதி திங்கட்கிழமை, ஜோகூர் மாநிலத்தில் பொது விடுமுறை அறிவிக்கப்பட்டுள்ளது.
ஜோகூர் இடைக்கால சுல்தான் துங்கு இஸ்மாயில் சுல்தான் இப்ராஹிமின் ஒப்புதலுடன் இந்த அறிவிப்பு வெளியிடப்பட்டதாக, மாநிலத்தின் புதிய மந்திரி பெசார் டத்தோ ஓன் ஹஃபீஸ் காஸி தெரிவித்துள்ளார்.
நேற்று நடைபெற்ற ஜோகூர் மாநிலத் தேர்தலில் பாரிசான் நேஷனல் 56 தொகுதிகளில் 48 இடங்களை கைப்பற்றி, மகத்தான வெற்றியுடன், மீண்டும் ஆட்சியைத் தக்க வைத்தது.
மீதமுள்ள 8 தொகுதிகளில் பக்காத்தான் ஹராப்பான் கூட்டணி வெற்றி பெற்றது.
மேலும், நேற்றைய வாக்குப்பதிவில், மொத்த வாக்காளர்களில் 18 லட்சத்து 74 ஆயிரத்து 918 பேர், அதாவது 68.73 சதவீதம் பேர் தங்கள் வாக்குகளைப் பதிவு செய்ததாக தேர்தல் ஆணையம் அறிவித்துள்ளது.
இதனிடையே, இன்று பிற்பகல் மாட்சிமை தங்கிய மலேசிய மாமன்னர் சுல்தான் இப்ராஹிம், பாரிசான் நேஷனல் தலைவர் டத்தோ ஸ்ரீ டாக்டர் அஹ்மட் ஜாஹிட் ஹமிடியை இச்தானா பாசிர் பெலாங்கி அரண்மனையில் சந்தித்து கலந்துரையாடினார்.
இந்தச் சந்திப்பில் டத்தோ ஓன் ஹஃபீஸ் காஸியும் கலந்து கொண்டதாக மாமன்னரின் அதிகாரப்பூர்வ முகநூல் பதிவில் தெரிவிக்கப்பட்டுள்ளது.
