கோலாலம்பூர் ஸ்டண்டர்ட் சார்டட் மரத்தான் போட்டியில் பங்கேற்ற இரு ஓட்டப்பந்தய வீரர்கள், இன்று காலை ஜாலான் முன்ஷி அப்துல்லாவில் மதுபோதையில் மோட்டார் சைக்கிளை ஓட்டியதாகக் கூறப்படும் 21 வயது இளைஞரால் மோதப்பட்டுக் காயமடைந்தனர்.
கோலாலம்பூர் போக்குவரத்து போலீஸ் துறைத் தலைவர் ஸம்சுரி ஈசா கூறுகையில், மரத்தான் பாதையில் அமைக்கப்பட்டிருந்த தடுப்புகளை மீறி மோட்டார் சைக்கிள் சென்றதாக முதற்கட்ட விசாரணையில் தெரிய வந்துள்ளது.
போலீஸ் துறையினர் நிறுத்துமாறு உத்தரவிட்டபோதும், அந்த இளைஞர் எதிர்திசையில் மோட்டார் சைக்கிளை ஓட்டித் தப்பிச் செல்ல முயன்றபோது, இரு ஓட்டப்பந்தய வீரர்கள் மீது மோதியதாகக் கூறினார்.
50 வயது பெண் ஓட்டப்பந்தய வீரரின் கழுத்தில் காயம் ஏற்பட்டுள்ள நிலையில், 41 வயது ஆண் வீரர் வலது முழங்கால் மற்றும் கையில் காயமடைந்துள்ளார்.
மோட்டார் சைக்கிளோட்டியின் மதுப் பரிசோதனையில் 100 மில்லிலிட்டர் இரத்தத்தில் 164 மில்லிகிராம் அளவு மதுபானம் இருந்தது தெரிய வந்ததாக ஸம்சுரி தெரிவித்தார்.
அவர் மூன்று நாட்களும், பின்னிருக்கை அமர்ந்திருந்த 19 வயது இளைஞர் இரு நாட்களும் தடுப்புக் காவலில் வைக்கப்பட்டுள்ளனர்.
