புத்ராஜெயா, பிப்.16-
நாளை பிப்ரவரி 17 முதல் MyJPJ செயலி மூலம் தற்காலிக ஓட்டுநர் உரிமம் – PDLஐ திறன்மிகு ஓட்டுநர் உரிமம் CDL ஆக மாற்றுவதற்கான விண்ணப்பங்களைச் செய்யலாம். சாலை போக்குவரத்து துறை – JPJ வின் தலைமை இயக்குநர் Aedy Fadly Ramli இன்று வெளியிட்ட அறிக்கையில், இந்த வசதி தகுதியுள்ள 2.38 மில்லியன் PDL உரிமம் வைத்திருப்பவர்களுக்கு பயனளிக்கும் என்று எதிர்பார்க்கப்படுகிறது என்று தெரிவித்தார். இந்த புதிய முறை, பொதுமக்கள் JPJ முகப்புகளுக்குச் செல்லாமல் இயங்கலையில் CDL விண்ணப்பங்களைச் செய்வதை எளிதாக்கும் நோக்கத்துடன் அறிமுகப்படுத்தப்பட்டுள்ளது. இதன் மூலம், PDL உரிமம் வைத்திருப்பவர்கள் தங்கள் திறன்பேசிகள் மூலம் எந்த நேரத்திலும், எங்கிருந்தும் MyJPJ செயலி மூலம் CDL விண்ணப்பங்களைச் செய்யலாம் என்று அந்த அறிக்கையில் கூறப்பட்டுள்ளது.
