ஜசெக மூத்த தலைவரும், செபூத்தே எம்.பி.யுமான திரேசா கோக் தொடுத்த அவதூறு வழக்கில், அம்னோ இளைஞர் பிரிவுத் தலைவர் டத்தோ டாக்டர் முஹமட் அக்மால் சால்லே தோல்வியடைந்தார். தெரேசா கோக்கிற்கு 2 லட்சத்து 50 ஆயிரம் ரிங்கிட் இழப்பீடும், வழக்குச் செலவாக 50 ஆயிரம் ரிங்கிட்டும் வழங்க மலாக்கா உயர் நீதிமன்றம் உத்தரவிட்டுள்ளது.
மேலும், திரேசா கோக்கிற்கு எதிராக அவதூறான கருத்துகளை வெளியிட அக்மாலுக்குத் தடை விதித்த நீதிமன்றம், சர்ச்சைக்குரிய பதிவுகளைச் சமூக ஊடகங்களிலிருந்து நீக்கவும் உத்தரவிட்டது.
நாட்டின் ஹலால் சான்றிதழ் விவகாரம் தொடர்பாக அக்மால் வெளியிட்டதாகக் கூறப்படும் கருத்துகளின் அடிப்படையில், 2024ஆம் ஆண்டு திரேசா கோக் இந்த வழக்கைத் தொடர்ந்திருந்தார். தீர்ப்பை வரவேற்ற திரேசா கோக், ஒருவரின் நற்பெயருக்குச் சேதம் விளைவிக்கும் அவதூறான பதிவுகளுக்கு சமூக ஊடகங்களைப் பயன்படுத்தக்கூடாது என்றும் வலியுறுத்தியுள்ளார்.
