கோலாலம்பூர், பிப்ரவரி.16-
நாளை செவ்வாய்க்கிழமை சீனப் புத்தாண்டு உலகெங்கும் கோலாகலமாகக் கொண்டாடப்படுகிறது. சீனப் புத்தாண்டின் 12 விலங்குகள் வரிசையில், இந்த 2026-ஆம் ஆண்டு 'நெருப்புக் குதிரை' ஆண்டாக மலர்கிறது. இது 60 ஆண்டுகளுக்கு ஒருமுறை மட்டுமே வரக்கூடிய மிகவும் சக்தி வாய்ந்த ஆண்டு என்பதால், சீன மக்கள் வழக்கத்திற்கு மாறாக எந்த ஆண்டும் இல்லாத அளவிற்கு இம்முறை மிகச் சிறப்பாகவும் பிரம்மாண்டமாகவும் கொண்டாட்டங்களை முன்னெடுத்து வருவதாக சீனச் சமுதாயத்தினர் உற்சாகத்துடன் தெரிவிக்கின்றனர்.
சீனப் பண்பாட்டில் குதிரை என்பது வேகம், வெற்றி மற்றும் தளராத விடாமுயற்சியின் அடையாளமாகும். இந்த நெருப்பு அம்சம் கொண்ட குதிரையின் நேர்மறை ஆற்றல், குடும்பத்தில் அளவற்ற மகிழ்ச்சியையும், தொழிலில் அசுர வளர்ச்சியையும் அள்ளித் தரும் என்பது சீனர்களின் ஆழமான நம்பிக்கை. குறிப்பாக, "குதிரை வந்தாலே வெற்றி நிச்சயம்" என்ற அவர்களது பழமொழிக்கேற்ப, இந்த ஆண்டில் எடுக்கப்படும் துணிச்சலான முடிவுகள் பெரிய முன்னேற்றத்தைத் தரும் என்பது சீன சமூகத்தின் ஐதீகமாகும்.
அறுபது ஆண்டுகளுக்கு ஒருமுறை மட்டுமே வரும் இந்த நெருப்புக் குதிரை ஆண்டைத் தங்கள் வாழ்நாளில் காண்பதை, சீன மக்கள் ஒரு பெரும் பாக்கியமாகக் கருதுகின்றனர்.
