புவியியல் அமைவிடம் மற்றும் விரிவான போக்குவரத்து இணைப்புகள் காரணமாக, அனைத்துலக போதைப்பொருள் கடத்தல் கும்பல்களானது மலேசியாவை கடத்தல் வழித்தடமாகப் பயன்படுத்தும் அபாயம் இருப்பதாக உள்துறை அமைச்சர் டத்தோ ஶ்ரீ சைஃபுடின் நசுத்தியோன் இஸ்மாயில் நாடாளுமன்றத்தில் இன்று தெரிவித்துள்ளார்.
போலீசாரின் உளவுத் தகவல்கள் மற்றும் அமலாக்க நடவடிக்கைகளின் அடிப்படையில், அனைத்துலக போதைப்பொருள் கடத்தல் நடவடிக்கைகளுக்கு மலேசியாவை வழித்தடமாகப் பயன்படுத்தப்படக்கூடிய அச்சுறுத்தல் அடையாளம் காணப்பட்டுள்ளதாகவும் அவர் குறிப்பிட்டுள்ளார்.
மேலும், மலேசியாவின் விமானம், தரை மற்றும் கடல் வழிப் போக்குவரத்து இணைப்புகளை அனைத்துலக குற்றக் கும்பல்கள் தங்களுக்குச் சாதகமாகப் பயன்படுத்திக் கொள்ளக்கூடும் என்றும் சைஃபுடின் இஸ்மாயில் எச்சரித்துள்ளார்.
இதன் மூலம் போதைப்பொருட்களை மலேசியாவுக்குள் கொண்டு வந்து உள்நாட்டுச் சந்தையில் விநியோகிப்பதுடன், பிற நாடுகளுக்கும் கடத்திச் செல்ல வாய்ப்புள்ளதாக அவர் குறிப்பிட்டுள்ளார்.
இத்தகைய நடவடிக்கைகளைத் தடுப்பதற்காகக் போலீசார் உளவுத் தகவல்களின் அடிப்படையில் கண்காணிப்பு மற்றும் அமலாக்க நடவடிக்கைகளை மேற்கொண்டு வருவதாகவும் அவர் தெரிவித்துள்ளார்.
