மைபிபிபி கட்சித் தலைவராக டத்தோ ஸ்ரீ மேக்லின் டெனிஸ் டி குரூஸ் அங்கீகரிக்கப்பட்டதை எதிர்த்து அக்கட்சியின் முன்னாள் தலைவர் டான்ஸ்ரீ எம். கேவியஸ் தொடுத்த வழக்கை புத்ராஜெயா, மேல்முறையீட்டு நீதிமன்றம் இன்று ஒருமனதாகத் தள்ளுபடி செய்தது. மூவர் கொண்ட நீதிபதிகள் குழு, நீதித்துறை மறுஆய்வைத் தொடங்க டான்ஸ்ரீ கேவியஸுக்கு அனுமதி மறுத்ததுடன் உயர் நீதிமன்றத் தீர்ப்பையும் உறுதி செய்தது.
டான்ஸ்ரீ கேவியஸ் தற்போது மைபிபிபி உறுப்பினர் இல்லை என்றும், தீர்வு காணப்படாத திவால் நிலையில் இருப்பதால் கட்சிப் பதவியை வகிக்க அவருக்கு உரிமை இல்லை என்றும் நீதிமன்றம் தெரிவித்தது.
மேலும், கட்சியின் உள்விவகாரங்கள் தொடர்பான சர்ச்சைகளை நீதிமன்றத்தில் சவால் செய்ய முடியாது என சங்கங்களின் சட்டத்தின் 18சி பிரிவை சுட்டிக்காட்டியது. 2023ஆம் ஆண்டு மெக்லின், கட்சித் தலைவராக அங்கீகரிக்கப்பட்டதை எதிர்த்து டான்ஸ்ரீ கேவியஸ் தொடர்ந்த வழக்கே தற்போது தள்ளுபடி செய்யப்பட்டுள்ளது. மேல்முறையீடு செய்வது குறித்து டான்ஸ்ரீ கேவியஸின் அறிவுறுத்தலுக்காக காத்திருப்பதாக அவரது வழக்கறிஞர் தெரிவித்துள்ளார்.
