ஜார்ஜ் டவுன், மே.17-
மலேசியாவில் நீண்ட காலமாகப் பயன்படுத்தப்பட்டு வரும் B40, M40, T20 வருமானப் பிரிவுகள், தற்போதைய பொருளாதார நிலையைப் பிரதிபலிக்கிறதா? என்ற விவாதம் அதிகரித்து வரும் நிலையில், T20 பிரிவுக்கான புதிய வரையறை குறித்து அமைச்சரவை இதுவரை எந்த ஆலோசனையும் நடத்தவில்லை என்று இரண்டாவது நிதியமைச்சர் அமீர் ஹம்ஸா அஸிஸான் தெரிவித்துள்ளார்.
அரசாங்கம் தற்போது மானிய எரிபொருள் விநியோகத்தை மேம்படுத்துவதிலும், குறிப்பாக BUDI95 திட்டத்தின் செயல்முறையை வலுப்படுத்துவதிலும் கவனம் செலுத்தி வருவதாகவும் அவர் குறிப்பிட்டுள்ளார்.
மேலும், கடந்த வார அமைச்சரவைக் கூட்டத்தில் T20 அல்லது வேறு எந்த ‘T’ வகைப்பாடு பற்றியும் விவாதிக்கப்படவில்லை என்பதையும் அவர் உறுதிப்படுத்தியுள்ளார்.
முன்னதாக, பிரதமர் டத்தோ ஸ்ரீ அன்வார் இப்ராஹிம், உயர் வருமானம் பெறும் மக்களுக்கான பெட்ரோல் மானிய மறுசீரமைப்பு தொடர்பான முன்மொழிவை, அரசாங்கம் விரைவில் இறுதிப்படுத்தும் என்றும், அதற்கு முன்பு அது குறித்த ஆய்வுகள் மேற்கொள்ளப்படும் என்றும் அறிவித்திருந்தார் என்பது குறிப்பிடத்தக்கது.
