அரசாங்கத்தின் முக்கியத் தகவல்களும் பொதுமக்களின் தனிப்பட்ட தரவுகளும் இஸ்ரேலால் தவறாகப் பயன்படுத்தப்படும் அபாயம் இருப்பதால், அரசு ஊழியர்கள் வேஸ் வழிகாட்டிச் செயலியைப் பயன்படுத்த மலேசிய அரசு தடை விதித்துள்ளதாகப் பிரதமர் டத்தோ ஸ்ரீ அன்வார் இப்ராஹிம் விளக்கமளித்துள்ளார்.
இஸ்ரேல் சட்டத்தின் கீழ் செயல்படும் வேஸ் மோபைல் லிமிடட் நிறுவனம், பயனர்களின் தரவுகளைக் கட்டுப்படுத்தும் பொறுப்பைக் கொண்டிருப்பதைக் கருத்தில் கொண்டு இந்த முடிவு எடுக்கப்பட்டதாகப் பிரதமர் அலுவலகம் தெரிவித்துள்ளது.
நேற்று பிரதமர் தலைமையில் நடைபெற்ற தேசிய இணையப் பாதுகாப்புக் குழுக் கூட்டத்தில் எடுக்கப்பட்ட முடிவு, உடனடியாக நடைமுறைக்கு வந்துள்ளது. இதற்குப் பதிலாக, மலேசிய நெடுஞ்சாலை ஆணையம் உருவாக்கியுள்ள உள்ளூர் வழிகாட்டிச் செயலியான தூஜூவைப் (TuJu) பயன்படுத்துமாறு பிரதமர் பொதுமக்களையும் கேட்டுக் கொண்டுள்ளார்.
இதற்கிடையில், வேஸ் பாதுகாப்பு அச்சுறுத்தலாகக் கருதப்பட்டால், அரசு ஊழியர்களுக்கு மட்டுமின்றி அனைத்து மக்களுக்கும் ஏன் தடை விதிக்கப்படவில்லை என பாஸ் நாடாளுமன்ற உறுப்பினர் அஃப்னான் ஹாமிமி தையிப் அஸாமுடின் கேள்வி எழுப்பியுள்ளார்.
