கோலாலம்பூர், நவம்பர்.16-
எல்டிபி எனப்படும் டாமன்சாரா - பூச்சோங் நெடுஞ்சாலையில் உள்ள பத்து 13 பூச்சோங் சுங்கச் சாவடி அருகே நேற்று இரவு நடத்தப்பட்ட அதிரடி சோதனையில், 115 மோட்டார் சைக்கிள்கள் மீதும் 120 ஓட்டுநர்கள் மீதும் சோதனையிடப்பட்டது. இந்த நடவடிக்கையின் விளைவாக, சட்டத்திற்குப் புறம்பாக மாற்றியமைக்கப்பட்ட 14 மோட்டார் சைக்கிள்கள் பறிமுதல் செய்யப்பட்டதுடன், பல்வேறு போக்குவரத்து விதிமீறல்களுக்காக 56 சம்மன்கள் வழங்கப்பட்டதாக சுபாங் ஜெயா மாவட்டக் காவற்படைத் தலைவர் அசிஸ்டன் கமிஷனர் வான் அஸ்லான் வான் மாமாட் தெரிவித்தார்.
குறிப்பாக, ஒரு மோட்டார் சைக்கிளோட்டி மது போதையில் வாகனம் ஓட்டியதற்காகவும், நான்கு பேர் ஆபத்தான வகையில் வாகனம் செலுத்தியதற்காகவும் உடனடியாக விசாரிக்கப்பட்டனர். இந்த நடவடிக்கைகள் மூலம் பெற்றோர்கள் தங்கள் பிள்ளைகளின் நடவடிக்கைகளைக் கண்காணித்து, மோட்டார் சைக்கிள் பந்தயம் போன்ற ஆபத்தான செயல்களில் அவர்கள் ஈடுபடுவதைத் தடுக்க வேண்டும் என்று வான் அஸ்லான் வலியுறுத்தினார்.
