புற்றுநோயால் பாதிக்கப்பட்ட சிறுவர்களுக்காக 2,200 கி.மீ ஓடும் 66 வயது முதியவர்

புற்றுநோயால் தனது மனைவியைப் பறிகொடுத்த 66 வயது முதியவர் லிம் ஷியாங் குவே, இக்கொடிய நோயால் பாதிக்கப்பட்டுள்ள சிறுவர்களுக்கு நிதி திரட்டவும் விழிப்புணர்வு ஏற்படுத்தவும் தீபகற்ப மலேசியாவைச் சுற்றி சுமார் 2,200 கிலோமீட்டர் தூரம் ஓடும் மாபெரும் முயற்சியை மேற்கொண்டுள்ளார். மலேசிய தேசிய புற்றுநோய் சங்கத்தின் ஆதரவுடன் Run for Gold எனும் பெயரில் மார்ச் 28-ஆம் தேதி பினாங்கில் தொடங்கும் இந்த ஓட்டம், சுமார் 90 நாட்களில் கேடா, பெர்லிஸ், கிளந்தான் உள்ளிட்ட பல மாநிலங்களைக் கடந்து மீண்டும் பினாங்கில் நிறைவடைய உள்ளது. புற்றுநோய் சிகிச்சைக்காக நெடுந்தூரம் பயணம் செய்து சிரமப்படும் குடும்பங்களுக்கு உதவும் நோக்கில் மேற்கொள்ளப்படும் இந்த அறப்பணி, வயது ஒரு தடையல்ல என்பதையும் சமூக அக்கறையையும் பறைசாற்றுவதாக அமைந்துள்ளது.