மலேசிய நெடுஞ்சாலைகளில் பிரம்மாண்டமான டிரெய்லர் லாரிகளை லாவகமாக ஓட்டி, ஆண்களின் ஆதிக்கம் நிறைந்த துறையில் முத்திரை பதித்து வருகிறார் 28 வயது காமணி. சிலாங்கூர், பந்திங்கை சேர்ந்த காமணி, கடந்த 6 ஆண்டுகளாக நாடு முழுவதும் கனரக வாகனங்களை ஓட்டி வருகிறார்.
மெக்கட்ரானிக்ஸ் இன்ஜினியரிங் துறையில் டிப்ளோமா முடித்த காமணி, தொழிற்சாலை ஒன்றில் பணிபுரிந்தபோது ஒரு பெண் டிரெய்லரில் அமர்ந்திருப்பதைப் பார்த்தார். அவர் ஓட்டுநராக இருப்பாரோ என்ற ஆர்வத்தில் விசாரித்தபோது, அவர் தனது கணவருக்குத் துணையாக வந்தவர் எனத் தெரியவந்தது. அந்த நிமிடமே, "ஏன் ஒரு பெண்ணால் கனரக லோரியை ஓட்ட முடியாது?" என்ற உத்வேகம் அவருக்குப் பிறந்தது.
விமான நிலைய வாடிக்கையாளர் சேவை அதிகாரி, தொழில்நுட்ப வல்லுநர் எனப் பல வேலைகளைச் செய்தாலும், டிரெய்லர் ஓட்டுவதில்தான் காமணிக்கு முழு சுதந்திரம் கிடைத்தது.
"டேங்கர் லாரி" ஓட்டுநரான காமணியின் தந்தை முருகன் தான், இவருக்குப் பெரிய உத்வேகம். தந்தையிடமிருந்தே பல நுணுக்கங்களைக் கற்றுக்கொண்டார்.
தனது லாரியையே இரண்டாவது வீடாக மாற்றிக்கொண்டுள்ள காமணி, அங்கேயே சமையல் உபகரணங்கள் மற்றும் அத்தியாவசியப் பொருட்களை வைத்துக்கொண்டு நீண்ட தூரப் பயணங்களை மேற்கொள்கிறார்.
