நாட்டின் எரிபொருள் தேவையைத் தடையின்றிப் பூர்த்தி செய்வதற்கு புதிய வியூகமாக ஆப்பிரிக்கா, தென் அமெரிக்கா மற்றும் அமெரிக்கா ஆகிய நாடுகளில் இருந்து கச்சா எண்ணெயைப் பெறுவதற்கான சாத்தியக்கூறுகளை மலேசியா ஆராய்ந்து வருகிறது. அதே வேளையில், வரும் ஜூலை இறுதி வரை நாட்டிற்குத் தேவையான எரிபொருள் இருப்பு முற்றிலும் பாதுகாப்பாக உள்ளதாகப் பொருளாதாரத் துறை அமைச்சர் அக்மால் நஸ்ருல்லா முகமட் நாசிர் தெரிவித்துள்ளார்.
விநியோகம் உறுதி செய்யப்பட்டுள்ளது என்று அரசாங்கம் கூறியதை, அதற்கு மேல் தட்டுப்பாடு ஏற்பட்டுவிடும் என்று தவறாகப் புரிந்து கொள்ளக் கூடாது என அவர் தெளிவுபடுத்தியுள்ளார்.
உலக சந்தையில் கச்சா எண்ணெய் விலையில் தொடர்ந்து ஏற்ற இறக்கங்கள் நிலவி வருவதால், மலேசியா நீண்ட கால விநியோக ஒப்பந்தங்களைத் தவிர்த்து வருகிறது. பெட்ரோனாஸ் நிறுவனம் புதிய விநியோக ஒப்பந்தங்களை உறுதிப்படுத்தியவுடன் அடுத்த கட்ட அறிவிப்புகள் வெளியாகும் என்றும் அமைச்சர் அக்மால் நஸ்ருல்லா குறிப்பிட்டார்.
புவிசார் அரசியல் பதற்றங்களுக்கு மத்தியிலும் நாட்டில் ரோன்95 பெட்ரோல் தொடர்ந்து லிட்டருக்கு RM1.99 என்ற நிலையான விலையிலேயே நீடிக்கும் என்று பிரதமர் டத்தோ ஸ்ரீ அன்வார் இப்ராஹிம் ஏற்கனவே உறுதியளித்திருந்தது குறிப்பிடத்தக்கது.
