ஈப்போ, மார்ச்.15-
ஈப்போ, Taman Menglembu Impiana Adril பகுதியில் உள்ள தனது வீட்டுக்கு அருகே உள்ள சாக்கடை ஒன்றில், உயர்க்கல்வி நிறுவன மாணவர் ஒருவர் இன்று மதியம் பிணமாகக் கண்டெடுக்கப்பட்டார். காலை 11.20 மணியளவில் தனது வாகனத்தை நிறுத்தச் சென்ற அண்டை வீட்டார் ஒருவர், சாக்கடைக்குள் இரத்தக் கறையுடன் இளைஞர் ஒருவர் கிடப்பதைக் கண்டு அதிர்ச்சியடைந்து காவற்படையினருக்குத் தகவல் அளித்துள்ளார். உயிரிழந்த மாணவர் தனது வீட்டிலிருந்து சுமார் 30 மீட்டர் தொலைவிலேயே மீட்கப்பட்டுள்ளார். இச்சம்பவத்தை உறுதிப்படுத்திய ஈப்போ காவற்படைத் தலைவர் துணை ஆணையர் Muhammad Najib Hamzah, மரணத்திற்கான காரணத்தைக் கண்டறிய மாணவரின் உடல் ஈப்போ Raja Permaisuri Bainun மருத்துவமனைக்கு உடற்கூறாய்வுக்காக அனுப்பி வைக்கப்பட்டுள்ளதாகத் தெரிவித்தார்.
