2022 ஆம் ஆண்டு பாலஸ்தீனியர் ஒருவர் கடத்தப்பட்ட வழக்கில் குற்றஞ்சாட்டப்பட்டுள்ள 8 பேரில் ஒருவரை கண்டுபிடிக்க முடியாததால், அவரைக் கைது செய்ய உயர் நீதிமன்றம் இன்று பிடியாணை பிறப்பித்தது.
31 வயதான இக்மால் அப்துல் ரஹிஸைக் கண்டுபிடிக்கும் முயற்சிகள் தோல்வியடைந்ததைத் தொடர்ந்து, நீதிபதி அரீஃப் இம்ரான் அரிஃபின் இந்த உத்தரவைப் பிறப்பித்தார்.
கடந்த செப்டம்பர் 11 ஆம் தேதி முதல் இக்மாலைத் தேடி வருவதாகவும், சிலாங்கூர் பந்திங்கில் உள்ள அவரது சொந்த ஊருக்குச் சென்றும் விசாரித்ததாகவும் துணை அரசு வழக்கறிஞர் ஜைலீன் நதியா சுபீர் தெரிவித்தார்.
இக்மால் கடந்த ஜனவரி முதல் சொந்த ஊருக்குத் திரும்பவில்லை என அவரது தந்தை தெரிவித்ததாகவும், அவரது உடன்பிறப்புகளுக்கும் அவர் இருக்கும் இடம் தெரியவில்லை என்றும் நீதிமன்றத்தில் தெரிவிக்கப்பட்டது.
இதையடுத்து, இக்மாலுக்கான 50,000 ரிங்கிட் பிணைத்தொகையை அவரது பிணையாளர் திரும்பப் பெற நீதிபதி உத்தரவிட்டார்.
