மலேசியாவில் தீபாவளி கொண்டாட்டம் என்பது வெறும் பண்டிகையாக மட்டுமின்றி, பல்வேறு இன மக்களிடையே ஒற்றுமையை வலுப்படுத்தவும், சமூகங்களுக்கு இடையிலான இடைவெளிகளைக் குறைக்கவும், தேவைப்படுவோருக்கு உதவும் மனிதநேயப் பண்புகளை வளர்க்கவும் பயன்பட வேண்டும் என்று பிரதமர் டத்தோ ஸ்ரீ அன்வார் இப்ராஹிம் தெரிவித்துள்ளார்.
நாளை தீபாவளி பண்டிகையை முன்னிட்டு அவர் வெளியிட்டுள்ள முகநூல் பதிவில், பல்வேறு கலாசாரங்கள் மற்றும் பாரம்பரியங்களைக் கொண்ட பல்லின மக்கள் வாழும் மலேசியாவில், பரஸ்பர மரியாதை, புரிந்துணர்வு மற்றும் ஒருவருக்கொருவர் கொண்டுள்ள வேறுபாடுகளை ஏற்றுக்கொள்ளும் மனப்பான்மை தொடர்ந்து வலுப்படுத்தப்பட வேண்டும் என்று குறிப்பிட்டுள்ளார்.
குறிப்பாக, சமூகங்களிடையே நல்லிணக்கத்தை ஏற்படுத்துவதுடன், கருணை மற்றும் பிறர் நலனில் அக்கறை செலுத்தும் பண்புகளையும் தீபாவளி கொண்டாட்டங்கள் ஊக்குவிக்க வேண்டும் என அவர் வலியுறுத்தியுள்ளார்.
மேலும், இந்தத் தீபாவளி புதிய சிந்தனைகளுக்கும், திறந்த மனப்பான்மைக்கும், உயர்ந்த நற்பண்புகளுக்கும் வழிவகுக்க வேண்டும் என்றும், அதன் மூலம் மக்களின் கண்ணியத்தையும் நாட்டின் ஒற்றுமையையும் மேலும் உயர்த்த முடியும் என்றும் அன்வார் தெரிவித்துள்ளார்.
இந்நிலையில், தீபாவளியைக் கொண்டாடும் அனைத்து மக்களுக்கும் தனது மனமார்ந்த வாழ்த்துகளைத் தெரிவித்துள்ள பிரதமர், இந்த நன்னாள் அனைவரது வாழ்விலும் மகிழ்ச்சி, அமைதி மற்றும் செழிப்பைக் கொண்டு வர வேண்டும் என்றும் வாழ்த்தியுள்ளார்.
