சரவாக் மாநில சட்டமன்றத்தைக் கலைப்பது தொடர்பான முக்கிய அறிவிப்பை, அம்மாநில முதலமைச்சர் டான் ஶ்ரீ அபாங் ஜொஹாரி ஓபேங் இன்று வெளியிடுவார் என எதிர்பார்க்கப்படுகின்றது.
இன்று பிற்பகல் 3.30 மணியளவில் காம்ப்லெக்ஸ் சத்ரியா பெர்திவியில் இது தொடர்பான செய்தியாளர் சந்திப்பை அவர் நடத்தவுள்ளார்.
முன்னதாக, மாநில ஆளுநர் துன் டாக்டர் வான் ஜுனாய்டி துவாங்கு ஜாஃபாரைச் சந்தித்து, சட்டமன்றத்தைக் கலைப்பதற்கான ஒப்புதலைப் பெறுவார் என்றும் எதிர்பார்க்கப்படுகின்றது.
இதனிடையே தற்போதைய சட்டமன்றத்தின் பதவிக்காலம் அடுத்த ஆண்டு பிப்ரவரியில் நிறைவடைகின்றது.
கடந்த 2021ஆம் ஆண்டு நடைபெற்ற தேர்தலில், ஜிபிஎஸ் எனப்படும் கபுங்கான் பார்ட்டி சரவாக் கூட்டணி 82 இடங்களில் 76 இடங்களைக் கைப்பற்றியது. மீதமுள்ள இடங்களை ஜசெக கட்சி தக்க வைத்தது.
இந்நிலையில், அடுத்த மாநிலத் தேர்தல் டிசம்பர் 12 முதல் 19ஆம் தேதிக்குள் நடைபெறலாம் என மாநில சுற்றுலா, கலை, புத்தாக்கத்துறை அமைச்சர் அப்துல் காரிம் ரஹ்மான் ஹம்ஸா ஏற்கெனவே தெரிவித்திருந்தார் என்பது குறிப்பிடத்தக்கது.
